तत्काल विदेशमा शाखा खोल्ने अवस्था छैन, ब्रोकर लाइसेन्सले व्यवसाय विस्तारमा सहयोग गर्छ

शंकर कुमार रायमाझी
२०७८ जेष्ठ २७, बिहीबार १०:५८

नेपाल पुनर्बीमा २०७१ साल साउन २२ गते कम्पनीका रुपमा स्थापना भएको र पुष ७ गते उद्घाटन भएको कम्पनी हो । कात्तिक २१ गते नेपाल पुनर्बीमा कम्पनी स्थापना भएको हो । पुनर्बीमा कम्पनी खोल्नु भन्दा अघि नै पुनर्बीमा ब्रोकरको लाइसेन्स दिनुपर्ने कानुनी व्यवस्था थियो । तर त्यति बेला सम्भव भएनछ ।

अहिले नेपाल पुनर्बीमा कम्पनीसँगै अर्काे एउटा कम्पनी थप्ने निर्णय भएको छ । नयाँ पुनर्बीमा कम्पनीले लाइसेन्स प्रक्रिया अघि बढाएपछि ब्रोकरलाई लाइसेन्स दिने सम्बन्धी व्यवस्था पनि अघि बढेको छ ।

पुनर्बीमा कम्पनीको व्यवसाय विस्तारका लागि ब्रोकर अनिवार्य हुन्छन् । अझ भनौं ब्रोकर बिना पुनर्बीमा कम्पनीहरुले आफ्नो व्यवसाय गर्नै असम्भव जस्तै हुन्छ ।
पुनर्बीमाको कारोबार र व्यवसाय गर्नका लागि ब्रोकर अनिवार्य सर्त हो ।

अब नेपाली नागरिकहरुले कुनै कम्पनी वा फर्म स्थापना गरेर ब्रोकर सेवा दिन सक्छन् । नेपालीहरुले ब्रोकर बन्न सक्ने अवस्था रहेन भने विदेशीहरुले पनि निश्चित प्रक्रिया पुरा गरेर पुनर्बीमा ब्रोकरको काम गर्न सक्छन् ।

ब्रोकर लाइसेन्सले पुनर्बीमा व्यवसायलाई मर्यादित, अनुशासित र सुरक्षित बनाउन सहयोग गर्छ । बीमा समितिबाट लाइसेन्स लिएर मात्रै ब्रोकर सेवा दिन सकिन्छ । यसबाट राज्यले कर पनि पाउँछ ।

र अहिले पनि छन् ब्रोकर
हामीले अहिले पनि भारत, सिंगापुरमा पुनर्बीमा ब्रोकर मार्फत काम गरिरहेका छौं । तोकिएका प्रडक्टका निम्ति मापदण्ड अनुसार कमिसन दिएर काम गरिरहेका छौं ।

हामीले पहिले ३३ देशमा कारोबार गरेका थियौं । एउटा जोखिम भएको प्रडक्ट घटाउँद १३।१४ वटा देशमा हाम्रो व्यापार चलिरहेको छ । ति व्यवसायहरु ब्रोकर मार्फत नै आएका थिए । व्यवसायमा जोखिम छैन् नाफा पनि छैन । धेरै जोखिम लिए धेरै नाफा हुन्छ भन्ने गरिन्छ । र जोखिम ग्रहण गर्ने भनेको विश्वासका आधारमा हो ।

जोखिम बढेपछि
व्यवसाय लिँदा राम्रोसँग ध्यान दिन सकिएन भने कम्पनीले नोक्सानी पनि व्यहोर्नुपर्ने हुन्छ । कहिलेकहीँ कम्पनी टाट पल्टिने अवस्था पनि आउन सक्छ ।
हामीले पनि ऐच्छिक रुपले गर्ने एउटा व्यवसाय राम्रो नदेखेपछि बन्द गरेका छौं । सुरुमा व्यवसाय विस्तार गर्ने नाममा खुरुखुरु काम गरियो । अण्डर राइटिङ पनि राम्रो गरिएको रहेनछ । धेरै दावी आउन थाले, कम्पनीको पुँजीमै जोखिम पुर्याउने देखेपछि हामीले त्यस्तो प्रडक्ट नै बन्द गरिदिएका हौं ।

तत्काल विदेशमा शाखा खोल्दैनौं
हाम्रो विदेशमा शाखा वा सम्पर्क कार्यालय खोल्ने योजना छ । तर त्यसका लागि निश्चित प्रक्रिया पुरा गर्नुपर्छ । हाम्रो नजिकको बजार भनेको भारत नै हो । भारतमा पनि शाखा खोल्नका लागि पुनर्बीमा कम्पनी खोलेर सेवा आरम्भ गरेको १० वर्ष पुरा हुनुपर्छ । त्यसपछि पनि अन्तराष्ट्रिय रेटिङ, पुँजी र प्रविधि, व्यवसायको आकार, जनशक्ति जस्ता पक्षका सर्तहरु हुन्छन् । ति सबै पुरा गरेपछि मात्रै भारतमा शाखा खोल्न पाइन्छ । तेश्रो मुलुकमा शाखा खोल्न त अझै धेरै सर्तहरु हुन्छन् ।

नेपाल पुनर्बीमा कम्पनीले २०७१ सालदेखि कारोबार थालेको हो । २०८२ सालमा मात्रै हामीले भारतमा शाखा खोल्नका लागि आवेदन दिन पाउँछौं । भारतको बीमा क्षेत्रको नियामक निकायमा लाइसेन्स दिने हो । त्यसका लागि उसले भनेका सर्तहरु पुरा गरेर शाखा खोल्ने अनुमति पाउन त अझै केहि समय लाग्छ ।

बोनस र हकप्रद बारे
बजारमा पुनर्बीमा कम्पनीले यति बोनस सेयर दिँदैछ, यति प्रतिशत हकप्रद सेयर दिँदैछ भन्ने हल्ला चलाईएको रहेछ । म अहिले त्यसबारे केहि पनि बोल्दिन् । त्यस सम्बन्धी निर्णयहरु उपयुक्त समयमा हुनेछन् । के निर्णय आउँछ ? त्यो समयले बताउँछ । अहिले केहि बोल्नु उपयुक्त हुन्न ।त्यसरी बोल्नु भनेको कानुनको उल्लंघन हो, कारवाहीको भागिदार हुनु हो । म यसबारे केहि भन्दिन् ।

(नेपाल पुनर्बीमा कम्पनीका सीईओ रायमाझीसँग गरिएको कुराकानीमा आधारित)

प्रतिक्रिया दिनुहोस्