सिंहदरबार संवाददाता
काठमाडौं । बीमा समितिले हिमालयन रिका लगानीकर्ताहरुलाई ७ अर्ब पुँजीको जोहो गर्न पत्र काटेको छ । समितिले हिमालयन रिका सम्पर्क व्यक्ति साहिल अग्रवालका नाममा असार ३ गते पत्र लेखेर ४५ दिनभित्र संस्थापकका तर्फबाट कबोल गरिएको ७ अर्ब रुपैयाँ बैंकमा जम्मा गरि समितिका नाममा ‘एयर मार्क’ गर्न भनेको हो ।
१० अर्ब पुँजीको हिमालयन रिले संस्थापकका तर्फबाट ७ अर्ब लगानी गर्न भनेको थियो ।
चार प्रतिष्पर्धी कम्पनीहरुलाई पछि पार्दै लाइसेन्स हात पारेको हिमालयनको अध्यक्षमा नेपाल उद्योग बाणिज्य महासंघका अध्यक्ष शेखर गोल्छालाई प्रस्ताव गरिएको छ । हिमालयनले जेठ १६ गते नयाँ रिका लागि आसयपत्र पाएको थियो । प्रमुख कार्यकारी अधिकृतका रुपमा भारतीय नागरिक मुकेश कपुरलाई अघि सारिएको छ ।
१०६ जना संस्थापक लगानीकर्ता रहेको हिमालयन रिमा राष्ट्रिय बाणिज्य बैंक र नेपाल बैंकले ५०।५० करोड रुपैयाँ लगानी गरेका छन् ।
त्यस बाहेक महासंघ अध्यक्ष शेखर गोल्छा, निवर्तमान अध्यक्ष भवानी राणा, पूर्व अध्यक्ष पशुपति मुरारका, नेपाल उद्योग परिसंघका अध्यक्ष सतिश मोर, जगदम्बा ग्रुप, एमभी दुगड ग्रुप, दिपक भट्ट लगायतको लगानी रहनेछ । हिमालयनमा व्यक्तिले भन्दा पनि कम्पनीका तर्फबाट लगानी प्रस्ताव गरिएको ४० वटा कम्पनीका तर्फबाट कुल लगानीको प्रतिवद्धता देखिन्छ ।
लगानी जुटाउनै कठिन
श्रोतका अनुसार समितिले ४५ दिनभित्रै ७ अर्ब रकम जोहो गर्न भनेपछि हिमालयन रिका लगानीकर्ता तनाबमा परेका छन् । बार्षिक रुपमा ठूलो मात्रामा कर तिर्ने समयमा समितिले पत्र काटेको भन्दै उनीहरु रुष्ट बनेका हुन् । ‘यस्तो बेलामा कसरी त्यत्रो पैसाको जाहो गर्नु ? अलि समय थपिदिनु पर्छ भन्ने कुरा आएको छ’, श्रोतले भन्यो ।
समितिले बैशाख १६ गते सार्वजनिक सूचना प्रकाशित गरेर एउटा रि इन्स्योरेन्स कम्पनीका लागि आवेदन खुलाएको थियो । काठमाडौं रि, अन्नपूर्ण रि, जेन्युइन रि, प्रुडेन्सियल रि र हिमालयन रिले आवेदन दिएका थिए । हिमालयन रिको लाइसेन्स प्राप्ति प्रक्रिया विवादमा भने परिसकेको छ ।
प्रतिक्रिया दिनुहोस्