क्लब हाउसको बहसबारे राष्ट्र बैंक र धितोपत्र बोर्डको चासो

सिंहदरबार संवाददाता
२०७८ असार १८, शुक्रबार ११:३०

काठमाडौं । सामाजिक सञ्जाल क्लब हाउसमा सञ्चालन भैरहेका बहसबारे नेपाल राष्ट्र बैंक र धितोपत्र बोर्डले चासो देखाउन थालेका छन् । बैंकका प्रमुख कार्यकारी अधिृकत लगायतका उच्च पदस्थहरुले क्लब हाउसमा मौद्रिक नीति, पुँजी वृद्धि, सेयर बजारको उचार चढाव, बैंकको सेयर मूल्य लगायतका विषयमा जथभावी बोल्न थालेपछि राष्ट्र बैंकले चासो देखाएको हो ।

राष्ट्र बैंककै केहि निर्देशक समेत क्लब हाउसको पुँजी बजार सम्बन्धी छलफलमा धारणा राखिरहेका छन् । ‘क्लब हाउसमा बैंकका जिम्मेवार व्यक्तिहरुले जथभावी धारणा राखिरहेको सूचना पाएका छौं, प्रमाण चाँही खोजेका छैनौं, क्लब हाउसमा भैरहेका छलफलबारे हाम्रो चासो छ’, नेपाल राष्ट्र बैंक स्रोतले सिंहदरबारसँग भन्यो ।

बैंकका सीईओसहित उच्च पदाधिकारीहरुलाई क्लब हाउसको छलफलमा सहभागी भएर सेयर बजारलाई प्रभावित पार्ने, मौद्रिक नीतिमा आउन सक्ने विषय, पुँजी वृद्धि, हकप्रद सेयर लगायतका विषयमा धारणा राख्न नहुने राष्ट्र बैंकको बुझाइ छ ।

उता, नेपाल धितोपत्र बोर्डले समेत क्लब हाउस छलफलबारे चासो देखाएको छ । बोर्डले आधिकारीक प्रतिक्रिया नदिए पनि मर्चेन्ट बैंकर, ब्रोकर, सूचिकृत कम्पनीका नेतृत्वतहका व्यक्तिहरु बसेर पुँजी बजार बढ्ने, घट्ने लगायतका विषयमा छलफल गरेकोबारे चासो देखाएको बुझिएको छ ।

‘जसलाई जे नगर्न भनिएको हो, उनीहरु नै क्लब हाउसमा बसेर त्यहि गन्थन गरिरहेको गुनासो आईरहेको छ, हामीलाई त्यसबारे चासो भने पक्कै छ’, धितोपत्र बोर्ड श्रोतले भन्यो ।

– सम्पादन गरिएको

प्रतिक्रिया दिनुहोस्