आईएमई जनरलको साढे दुई लाख कित्ता सेयर बेच्दै नेपाल बंगलादेश बैंक

सिंहदरबार संवाददाता
२०७८ असार २५, शुक्रबार १२:२३

काठमाडौं । नेपाल बंगलादेश बैंकले आईएमई जनरल इन्स्योरेन्समा रहेको साढे दुई लाख कित्ता सेयर बेच्न लागेको छ । बैंकले आईएमई जनरलमा रहेको २ लाख ५६ हजार ९ सय ३६ कित्ता सेयर बेच्न लागेको हो । बैंक सञ्चालक समितिले इन्स्योरेन्स कम्पनीमा रहेको संस्थापक सेयरमध्ये साधारण सेयरमा परिवर्तित भएको सेयर बेच्ने निर्णय गरेको हो ।

आईएमई जनरलमा नेपाल बंगलादेश बैंकको करिब १० प्रतिशत सेयर रहेको छ । संस्थापक सेयरको हिस्सा ८० प्रतिशतबाट घटाएर ६० प्रतिशत बनाउँदा साधारण सेयरमा परिणत भएको सबै सेयर बेच्ने निर्णय बैंकले गरेको हो । आईएमई जनरलमा नेपाल बंगलादेश बैंकका तर्फबाट चाटर्ड एकाउन्टेन्ट सुरेश देवकोटा सञ्चालक समिति सदस्य छन् ।

तर बीमकको संस्थागत सुशासन सम्बन्धी निर्देशिका, २०७५ ले भने बीमा कम्पनीको सञ्चालकले पद छाडेको एक वर्षसम्म सो संस्थाको कुनै पनि सेयर तथा डिबेञ्चर खरिद गर्न नपाउने व्यवस्था गरेको छ ।

निर्देशिकाको परिच्छेद–३ को दफा १७ उपदफा ७ मा ‘सञ्चालकले पदमा बहाद रहुञ्जेल र सो पदबाट हटेको एक वर्षसम्म सोही बीमकको कुनै पनि प्रकारको सेयर, डिबेञ्चर खरिद बिक्रि गर्न पाउने छैन’ भन्ने व्यवस्था छ ।

तर बैंकले भने कम्पनीमा आफ्नो प्रतिनिधी संस्थापक सेयरधनीका रुपमा सहभागी भएकाले साधारण तर्फको सेयर बेच्न पाउनुपर्ने तर्क अघि सारेको छ ।

हाल दोश्रो बजारमा आईएमई जनरलको सेयर मूल्य प्रति कित्ता ११९५ रुपैयाँमा किनबेच भैरहेको छ । साधारण तर्फ रुपान्तरण भएको सेयर बेच्न पाएमा बैंकको नाफामा ३० करोड ६२ लाख ६७ हजार ७ सय १७ रुपैयाँ प्राप्त गर्नेछ । यसरी प्राप्त भएको रकमबाट लाभांश बाढ्ने सुबिधा बैंकसँग रहन्छ । नविल बैंकसँग मर्जरमा जाने तयारी गरिरहेको बैंकले आईएमई जनरलको सेयर बेच्न थालेको हो ।

 

प्रतिक्रिया दिनुहोस्