सामाजिक सुरक्षा कोष विरुद्ध बैंकका कर्मचारीले निकाले जुलुस

सिंहदरबार संवाददाता
२०७८ श्रावण ४, सोमबार १०:३६

काठमाडौं । सामाजिक सुरक्षा कोष विरुद्ध बैंक तथा वित्तिय संस्थाका कर्मचारीहरुले जुलुस निकालेका छन् । मंगलबार बैंकका कर्मचारीहरुले रत्नपार्क घण्टाघर क्षेत्रमा बिरोध जुलुस निकालेका हुन् ।

उनीहरुले ‘ब्याक अफ एसएसएफ’ लेखिएको प्लेकार्ड बोकेका छन् । सामाजिक सुरक्षा कोषले खाईपाई आएको सुबिधा घट्ने गरि आवद्ध हुने जबरजस्ति गरेको भन्दै आन्दोलन गरेका हुन् । आन्दोलनमा नविल बैंक, नेपाल बंगलादेश बैंक, बैंक अफ काठमाण्डू लगायतका अधिकांश बैंक तथा वित्तिय संस्थाका कर्मचारीहरु सहभागी थिए ।

नबिल बैंक कर्मचारी युनियनका अध्यक्ष सबिन भट्टराईले बैंकका कर्मचारीहरुले खाईपाई आएको सुबिधा खोस्ने गरि सञ्चालनमा रहेको सामाजिक सुरक्षा कोषमा यथास्थितिमा आवद्ध हुन नसकिने निष्कर्षसहित आन्दोलन सुरु गरेको बताए । जुलुसमा तीन हजारको हाराहारीमा बैंकका कर्मचारीहरु सहभागी रहेको दावी पनि उनले गरे ।

प्रतिक्रिया दिनुहोस्