सिंहदरबार संवाददाता
काठमाडौं । नेपाल लघुवित्त बैंकर्स संघका नवनिर्वाचित अध्यक्ष प्रकाश राज शर्माले नयाँ लघुवित्तलाई पनि पुराना झैं उत्तरदायी बनाउन उत्प्रेरित गर्न आफ्नो कार्यकाल व्यतित हुने बताएका छन् । संघको साधारणसभामार्फत् अध्यक्ष बनेपछि सिंहदरबारलाई प्रतिक्रिया दिँदै लक्ष्मी लघुवित्तका प्रमुख कार्यकारी अधिकृत रहेका नवनियुक्त अध्यक्ष शर्माले यस्तो बताएका हुन् ।
“मेरो कार्यकालमा आफू जिम्मेवार भइ अरुलाई पनि जिम्मेवार हुन उत्प्रेरित गर्नेछु र संघलाई दीगो बाटोमा डोहोर्याउने छु,” शर्माले थपे, “जसलाई हामीले सेवा गर्नुपर्ने हो उहाँहरुप्रति उत्तरदायी हुनेछौं र संस्थागत दीगो रुपमा अगाडि बढाउने सँगै पोलिसी लबिङमा मेरो कार्यकाल बित्नेछ ।”
साथै वित्तीय पहुँच बढाउन तथा, वित्तीय साक्षरता विस्तार गर्न संघ लागिपर्ने उनको भनाइ छ ।
अहिले नयाँ लघुवित्त संस्थाहरु पुराना झैं उत्तरदायी भएनन् भन्ने गुनासो छ । “तर, नयाँहरुलाई पनि लघुवित्तको मूल्य मान्यतालाई बढावा दिन सहयोग गर्नेछु । म पुरानो लघुवित्तको अभ्यासकर्ता भएका नाताले यही गर्नेछु,” उनले थपे ।
ग्रामिण क्षेत्रका सर्वसाधारणमा थप पहुँच पुर्याउने, कृषि, घरेलु उद्योग र व्यवसायलाई बढावा दिने र ग्रामिण रोजगारी सिर्जना गर्ने सरकारको योजना कार्यान्वयन गर्न नेपाल राष्ट्र बैंकको निर्देशनको उचीत पालना गर्न सदस्य लघुवित्तलाई उत्प्रेरित गर्ने उनको भनाइ छ ।
प्रतिक्रिया दिनुहोस्