सिंहदरबार संवाददाता
काठमाडौं । भदौ महिनामा पनि वाणिज्य बैंकहरुले निक्षेपको ब्याजदर नबढाउने भएका छन् । विगत ५ महिनायता यथावत रहेको ११.०३ प्रतिशत ब्याजदरलाई भदौ महिनामा पनि कायमै राख्ने सहमति वाणिज्य बैंकहरुको छाता संगठन नेपाल बैंकर्स संघले गरेको हो ।
ब्याजदर बढाउँदा थप निक्षेप नबढ्ने निश्कर्ष निकाल्दै भदौ महिनामा पनि पुरानौ दर कायम गरिने सहमति भएको नेपाल बैंकर्स संघका एक सदस्यले जानकारी दिए ।
‘साउन महिनामै १ खर्ब २२ अर्ब रुपैयाँ वाणिज्य बैंकहरुबाट निक्षेप बाहिरिएको छ, ब्याजदर बढाउँदैमा थप निक्षेप संकलन नहुने रहेछ, त्यही भएर संघले भदौ महिनामा पनि निक्षेपको ब्याजदर नबढाउने निर्णय गरेको छ । यो सहमति पहिले नै सबै वाणिज्य बैंकका साथीहरुसँग बसेर गरिसकेका थियौं । अहिले संघका कार्यसमितिले आधिकारीक निर्णय गरेको हो ।’ संघ ती सदस्यले सिंहदरबारसँग भने, ‘दर बढाउँदा खर्चमात्र बढाउने भन्दै भदौ महिनामा पनि पुरानौ ब्याजदरलाई यथावत राख्ने एक तहको सहमति भएको हो । संस्थागत मुद्धतीमा भने राष्ट्र बैंकले तोकेअनुसार व्यक्तिगतमा भन्दा २ प्रतिशत कम अर्थात् ९.०३ प्रतिशत ब्याजदर तोकिनेछ ।’
राष्ट्र बैंकका गभर्नर महाप्रसाद अधिकारीले आगामी महिानादेखि बैंकको ब्याजदर बढाउनु पर्ने आवश्यकता औल्याइ रहँदा बैंकरहरुले भने नबढाउने निर्णय गरेका हुन् । तरलता अभावको अहिलेको अवस्थामा निक्षेपको ब्याजदर बढाउँदा अस्थिरता सिजना हुने ती सदस्यको भनाइ छ । संघका सदस्य बैंकरहरुसँग अनौपचारीक रुपमा ब्याजदर नबढाउने सहमति भएको हुँदा आधिकारीक रुपमा संघले विज्ञप्ती नै जारी गर्ने उनले बताए ।
वाणिज्य बैंकहरुले गत माघको तुलनामा फागुन महिनामा मुद्दती निक्षेपको औसत ब्याजदर (१०.०३ प्रतिशत) को १० प्रतिशतले बढाएर अधिकतम ११.०३ प्रतिशत कायम गरेका थिए । वाणिज्य बैंकहरुका निक्षेपकर्ताले चैत, वैशाख, जेठ, असार र साउनमा सोही दरमै ब्याज पाएका थिए । अब भदौ महिनामा पनि सोही दरमा ब्याज पाउने निश्चित भएको छ । संस्थागत मुद्धती निक्षेपमा भने राष्ट्र बैंकले अघिल्लो साता सकुर्लर जारी गर्दै व्यक्तिगत मसद्धतीको भन्दा २ प्रतिशत कम ब्याजदर कामय गर्न निर्देशन दिएसँगै सोही समयदेखि ९.०३ प्रतिशत ब्याजदर कायम छ । रेमिट्यान्स खातामा भने बैंकहरुले अधिकतम ब्याजदरको १ प्रतिशत बढी दिन पाउने हुँदा १२.०३ प्रतिशत ब्याजदर ग्राहकले पाउने छन् ।
यता विकास बैंक र फाइनान्स कम्पनीका छाता संगठनहरुले हालसम्म ब्याजदर थपघट सम्बन्धि कुनै निर्णय गरिसकेका छैनन् ।
प्रतिक्रिया दिनुहोस्