सिंहदरबार संवाददाता
काठमाडौं । नर्सरी व्यवसायी संघले फलफूल नर्सरीको व्यावसायिक उत्पादनको प्रदर्शनी तथा विक्री वितरणका लागि ‘नेशनल हर्टिकल्चर एक्स्पो-२०८०’ गर्ने भएको छ । संघले एक्स्पो चैत्र १६ गतेदेखि १९ गतेसम्म भृकुटीमण्डपमा गर्ने भएको हो ।
मेलामा ७४ व्यवसायीक स्टल, ४ फुड स्टल, ७ अफिसियल स्टल तथा प्रतिष्पर्धाको ५ स्टल गरी जम्मा ९० स्टलहरु रहनेछ । आर्थिक मन्दिले सुस्ताएको अर्थतन्त्र विकासमा यस मेलाले सहयोग गर्ने मेला संयोजक तथा संघका अध्यक्ष रामजी कुँवरले बताए । मेलामा पुष्प नर्सरी, फलफूल नर्सरी, कृषि वन नर्सरी तथा जडिबुटी नर्सरीको ७ सयभन्दा बढि प्रजातीका बोटविरुवाहरु प्रदर्शनी तथा विक्रि वितरण गर्ने छ । उनले भने, ”एक्स्पोमा नेपाल टेलिकम, एजीए एग्रो, कुमारी फ्लोरा फार्म, सृजना एग्रीकल्चर प्रालिले सहयोग गरेको छ । सरकार तथा पालिकाबाट आर्थिक सहयोग आएको छैन ।”
नर्सरी व्यवसाय गर्न चाहने नव उद्यमी, जिज्ञाशु एवं अध्ययन साथै अनुसन्धान गर्न चाहनेहरुका लागि यो एक्स्पाले महत्वपूर्ण योगदान पुर्याउने संघले जनाएको छ । मेलामा कम्तीमा ५० हजार अवलोकनकर्ताले अवलोकन गर्ने साथै, १ करोडभन्दा बढीको आर्थिक कारोबार हुने अपेक्षा संघले जनाएको छ ।
मेला अवलोकन गर्न सर्वसाधारणको लागि १ सय र विद्यार्थी तथा जेष्ठ नागरिकका लागि ५० रुपैयाँ लाग्ने छ । मेलाको लागि भाडा, खाजा पानी खर्च, सरसफाई, २५ हजार स्टल भाडा गरी धेरै खर्च गर्नुपर्ने भएकाले शुल्क सिस्टम राखेको अध्यक्ष कुवँरले जानकारी दिए । आर्थिक सहयोगका लागि काठमाडौं महानगरपालिकाका १८ वटा नगरपालिकामा प्रपोजल पेश गरेको तर सहयोग भने नआएको उनको गुनासो छ ।
प्रतिस्पर्धीको मूल्याङ्कनका लागि वनस्पती, माटो र पर्यावरणविज्ञ सम्मिलित तीन सदस्यीय समिति गठन गरिएको उनले जानकारी दिए । एक्स्पोको प्रवद्र्धकमा पुष्प विकास केन्द्र, वनस्पति विभाग, प्लान्ट क्वारेन्टिन एवं विषादी व्यवसाय केन्द्र, कृषि तथा पशुपक्षी विकास मन्त्रालय रहेका छन् ।
प्रतिक्रिया दिनुहोस्