सिंहदरबार संवाददाता
गण्डकी । गण्डकी प्रदेशका मुख्यमन्त्री सुरेन्द्रराज पाण्डेले प्राकृतिक एवं सुन्दर नगरी पोखरालाई पर्यटकीय राजधानीका रूपमा विकास गर्ने प्रतिबद्धता व्यक्त गरेका छन् ।
लेखनाथ उद्योग वाणिज्य संघको २७औं संस्थापना दिवस तथा २६औं वार्षिकोत्सव कार्यक्रममा उहाँले पोखरालाई पर्यटकीय राजधानीको रूपमा विकास गर्न प्रचुर सम्भावना भएकै कारण आफ्नो ध्यान पोखरालाई पर्यटकीय राजधानी बनाउनेतर्फ केन्द्रित रहेको बताए ।
स्वदेशी तथा विदेशी पर्यटकले खचाखच हुने पोखराका नौवटै तालको संरक्षण गर्दै ती ताललाई पर्यटकीयरूपमा विकास गर्ने लक्ष्य आफ्नो रहेको कुरा उनले सुनाए।
पर्यटकलाई आकर्षण गर्न पोखरा क्षेत्रीय अन्तर्राष्ट्रिय विमानस्थलमा अन्तर्राष्ट्रिय उडान भर्नका लागि छिमेकी मुलुक भारत र चीनसँग प्रधानमन्त्रीस्तरबाट पहल गर्न आफूले प्रधामन्त्रीलाई आग्रह गरेको जानकारी उनले दिए। गण्डकी प्रदेशको विकासका लागि पर्यटन क्षेत्रमा काम गर्ने सामाजिक संघ संस्था उद्योग वाणिज्य संघलगायतका सरोकारवालासँग सामूहिक कार्यक्रम सञ्चालन गरी समस्याको पहिचान गर्दै यहाँको पर्यटन व्यवसायलाई लयमा फर्काउने सोचमा आफू रहेको उनले बताए।
उनले आजै लेखनाथ उद्योग वाणिज्य संघद्वारा बेगनास ताल छेउमा निर्मित ‘बेगनास लेक’ लेखिएको लेटर बोर्डको अनावरणसमेत गरे।
सोही अवसरमा पोखरा महानगरपालिकाका प्रमुख धनराज आर्चायले पोखरा र लेखनाथबीचमा देखिएको असमझदारीलाई अन्त्य गर्दै पोखराको विकासका लागि सामूहिक भावनाले अगाडि बढ्न अनुरोध गरे। विकास निर्माणका साथै नीति निर्माण र बजेट विनियोजनमा लेखनाथ र पोखराका वडाका बीच कुनै भिन्नता नभएको जिकिर उनको छ ।
पोखरा महानगरपालिकाको वडा नंं ३३ र तनहुँको शुक्लागण्डकी नगरपालिकाको केही भू–भागलाई समेटर पुँडिटारमा नयाँ औद्योगिक क्षेत्र निर्माणको कार्य यसै वर्षदेखि कार्य सुरु गरिने जानकारी प्रमुख आचार्यले दिए।
लेखनाथ उद्योग वाणिज्य संघका अध्यक्ष छत्रधर आत्रेयले लेउवा संघ उद्योग व्यवसायीको संस्थामात्र नभई सबै जातजाति, सामाजिक संघसंस्थाको नेतृत्वदायी भूमिका निर्वाह गर्ने संस्था रहेको जिकिर गरे । लेखनाथ उद्योग वाणिज्य संघले यस क्षेत्रमा पर्यटन विकासका लागि स्थानीय सरकार र प्रदेश सरकारसँग हातेमालो गर्दै विकासका योजना सञ्चालन गर्न चाहेको उनको भनाइ छ ।
लेखनाथ उद्योग वाणिज्य संघका संस्थापक अध्यक्ष चन्द्रकृष्ण कर्माचार्य, पूर्वअध्यक्ष चतुराखर अधिकारी, बागलुङ जिल्ला उद्योग वाणिज्य सङ्घका अध्यक्ष नरेश कँडेल, लेउवा संघका उपमहासचिव जानुका पराजुलीलगायतले आफ्ना भनाइ राखेका थिए।
संघले स्थापना दिवसको अवसर पारी सामाजिक उत्तरदायित्व कार्यक्रमअन्तर्गत पोखरा–३२ को राधाकृष्ण वृद्धाश्रमलाई १ लाख रूपैयाँको अक्षयकोष स्थापना गर्न आश्रमका अध्यक्ष प्रेम लिगललाई रकम हस्तान्तरण गरेको थियो ।
त्यसैगरी संघलाई सहयोग गर्ने त्रिभुवन शान्ति माविलाई ५० हजार रूपैयाँ र व्यवसाय प्रवर्द्धन तथा सर्वेक्षण कार्यका लागि त्रिवेणी इन्टरनेशनल कलेजलाई ५० हजार रूपैयाँ, व्यवसायी कल्यणकारी कोषअन्तर्गत आगलागीबाट क्षति भोगेका संघका सदस्य शोभामोहन सुवेदीलाई ५० हजार रूपैयाँ, पावर हाउस बजार व्यवस्थापन समितिलाई उज्यालो कार्यक्रमका लागि ४० हजार रूपैयाँ प्रदान गरिएको थियो ।
सोही अवसरमा संघद्वारा प्रदान गरिने एक लाख एक हजार बराबरको नगद पुरस्कार राशि रहेको चन्द्रलक्ष्मी ज्येष्ठ नागरिक सम्मान पुरस्कारबाट ज्येष्ठ नागरिकको क्षेत्रमा कार्य गर्दै आएका पोखराका समाजसेवी भक्तराज श्रेष्ठलाई सम्मान गरिएको थियो । रासस
प्रतिक्रिया दिनुहोस्