सिंहदरबार संवाददाता
उदयपुर । उदयपुरको त्रियुगा नगरपालिकाका–१३ स्थित बेहडवाको थारु आवास (होमस्टे) मा पर्यटकको आगमन बढ्न थालेको छ । दुई वर्षअघि सञ्चालित होमस्टेमा दैनिक सयौँको सङ्ख्यामा पर्यटकको आगमन बढ्न थालेको हो ।
मेचीदेखि महाकालीसम्म र हिमाल पहाडसहित आन्तरिक तथा बाह्य पर्यटकको सङ्ख्यामा उल्लेख्य वृद्धि भइरहेको होमस्टे सञ्चालक बताउँछन् । पर्यटकको आगमन बढे्सँगै आम्दानी पनि वृद्धि भएको व्यवसायी बताउँछन् । गाउँलेहरुले मिलेर सञ्चालन गरेको यो सामुदायिक होमस्टेमा अहिले आन्तरिक तथा बाह्य पर्यटकको सङ्ख्या बढ्न थालेको होमस्टे सञ्चालक समितिका अध्यक्ष उतिमलाल चौधरीले बताए । “सुरुमा आठ घरपरिवार मिलेर सञ्चालन गरेका हौँ । स्थानीय पर्यटन प्रवर्द्धन र थारु संस्कृतिको प्रचारप्रसार गर्ने लक्ष्यका साथ होमस्टे सञ्चालन गरेका हौँ”, उनले भने ।
सुरुमा पर्यटकको आगमन न्यून रहको भन्दै पछिल्लो एक वर्षयता दैनिक सयौँको सङ्ख्यामा पर्यटक आउने गरेका चौधरीले जानकारी दिए । अहिले पर्यटकको प्रभावकारी व्यवस्थापन गर्न निकै चुनौती बन्न थालेको उनको भनाइ छ । अध्यक्ष चौधरीका अनुसार नेपालको पश्चिम महाकालीदेखि तराई तथा काठमाडांैं र पूर्वी नेपालका साथै भारतको बिहार दार्जिलिङ, सिलीगुढी, कालिम्पोङसम्मका पर्यटक होमस्टेमा बस्नका लागि आउने गरेको समितिका सदस्य नन्दु चौधरीले बताए ।
समितिका लेखा प्रमुख प्रभा चौधरीका अनुसार अहिले होमस्टेमा एकसाता अगाडिदेखि सबै कोठा बुकिङ हुन थालेका छन् । बाहिरबाट आउनेले एकसाता पहिला नै सूचनामार्फत कोठा लिने गरिरहेका उनको भनाइ छ । होमस्टेमा दैनिक न्यूनतम ५० हजारभन्दा बढीको आर्थिक कारोबार हुने गरेको उनले जानकारी दिए । थारु संस्कृतिमा आधारित खानाको परिकार, पहिरन र आगन्तुकलाई गरिने स्वागतसहितको व्यवहारले पर्यटक आकर्षित हुँदै गएका स्थानीय दुर्गानन्द चौधरीले बताए ।
होमस्टे सञ्चालन गरेको छोटो समयमा यहाँ पर्यटनको आगमन बढेको भन्दै यसले रोजगारी सिर्जना हुनुका साथै आर्थिकस्तर वृद्धि गरेको त्रियुगा नगरपालिकाका मेयर वसन्त बस्नेतले बताए । यहाँ सञ्चालित होमस्टेका कारण आन्तरिक तथा बाह्य पर्यटन प्रवर्द्धनमा टेवा पुग्न थालेको उनको भनाइ छ । यहाँ सञ्चालित होमस्टेले पर्यटन प्रवर्द्धनमा र विकास टेवा पु¥याएको भन्दै पर्यटन बोर्डले हालै पुरस्कृतसमेत गरेको छ ।
प्रतिक्रिया दिनुहोस्