सिंहदरबार संवाददाता
काठमाडौं । पुर्व प्रधानमन्त्री तथा एकीकृत समाजवादीका अध्यक्ष माधव कुमार नेपालले सत्ता गठबन्धन फुटबल जस्तै भएको र उलट पुलट जारी रहेको बताएका छन् ।
पार्टीको रौतहट-काठमाडौं सम्पर्क मंचको वनभोज कार्यक्रमलाई सम्बोधन गर्दै अध्यक्ष नेपालले ‘गठबन्धन फुटबल जस्तै भयो । कहिले कता कहिले कता गइरहेको छ । अझै कता जाने हो ठेगान छैन । गठबन्धनमा उलटपुलट जारी छ । चुनाव पछि तेस्रोपटक गठबन्धन फेरियो, अझै के हुने हो ? थाहा छैन ।’, अध्यक्ष नेपालले भने ।
उनले सुदुरपश्चिम प्रदेश सरकारका कारण गठबन्धन भत्किएर नयाँ गठबन्धन बन्ने अवस्था बनेको तर अन्तिममा पुनः अहिलेकै गठबन्धनबाट आफ्नो पार्टीले मुख्यमन्त्री प्राप्त गरेको पनि उनले बताए ।
‘सुदुरपश्चिममा मुख्य मन्त्री हामीलाई दिने भन्ने सहमती थियो, पछि फेरि नदिने भने । अनि अर्को गठबन्धन बाट मुख्यमन्त्री बन्ने अवस्था आईसकेको थियो । पछि बल्ल हाम्रो मुख्य मन्त्री बन्नु भयो ।’अध्यक्ष नेपालले भने ।
अहिले फेरि मुख्यमन्त्रीले बिश्वासको मत लिने समयमा फेरि किचलो निस्किएको उनले बताए । ‘अहिले फेरि बिश्वासको मत लिने वातावरण अझै बनिरहेको छैन । राजनितिमा अब के हुन्छ भन्ने कुरा हाम्रो पार्टी लाई कसरी हेरिन्छ भन्नेमै निर्भर गर्छ ।’ उनले भने ।
उनले आफ्नो अगुवाइमा रौतहटमा बिकासको बहार आइरहेको पनि बताए । ‘रौतहटमा बिकासका राम्रा प्रोजेक्ट आइरहेका छन् । यसपालिको बजेटमा पनि राम्रो पैसा जिल्लामा गएको छ । आगामी बजेटमा पनि राम्रो पैसा राख्ने योजना छ ।’अध्यक्ष नेपालले भने ।
प्रतिक्रिया दिनुहोस्