युवा तथा साना व्यवासायी स्वरोजगार कोषको २ दिने तालीम सम्पन्न

काठमाडौं । युवा तथा साना व्यवसायी स्वरोजगार कोषले देशभरका जिल्लाका ६१ जना कर्जा असुली सहजकर्ताहरुलाई तालीम दिएको छ । युवा तथा खेलकुद मन्त्रालय अन्तर्गतको कोषले असोज १५ र १६ गते २ दिने तालीम भक्तपुरको नगरकोटमा सम्पन्न गरेको हो ।

कर्जा असुली सहजकर्तालाई दिइएको दूई दिवसीय आधारभूत तालीमको उद्घाटन कोषका उपाध्यक्ष डा. देवराज रोक्काले गरेका थिए । कोषले दिएको सो तालीमको उद्देश्य, प्रशिक्षणका विषय तथा सम्पुर्ण तालीमको प्रभावकारीताको बारेमा कार्यकारी निर्देशक विश्व मोहन अधिकारीले गराएका हुन् ।

कोषले जिल्लामा कार्यरत कर्जा असुली सहजकर्ताहरुलाई स्वरोजगार कर्जा लगानी, अनुगमन, तालीम, बिमा, सरकारी लेखा, असुली, कारवाही, उत्प्रेरणा लगायत कोषका कार्यक्रम सञ्चालन गर्दा आइपर्ने सम्पूर्ण विषय वस्तुहरुको ज्ञान दिएको छ ।

उक्त तालीमको प्रशिक्षण कोषका कार्यकारी निर्देशक, कोषका शाखा प्रमुख, अन्य संस्थाका विज्ञहरुले गराएका थिए ।

स्वरोजगारिता सिर्जनाका लागि कोषेढुंगाको रुपमा विभिन्न जिल्लामा विगत १० वर्षदेखि कर्जा असुली सहजकर्ताहरुलाई कोषले यसप्रकारको तालीम दिँदै आएको छ ।

सहभागी प्रशिक्षार्थिहरुले तालीम निकै प्रभावकारी रहेको र आगामी दिनमा कोषको कार्यक्रम सञ्चालनमा तालीमले निकै सहयोगि भुमिका खेल्ने प्रतिक्रिया दिएका थिए ।