धितोपत्र बोर्डका उप-कार्यकारी नवराज अधिकारीलाई मेरो १८ प्रश्न (खुलापत्र)

नवराज दाहाल
२०७९ असार २, बिहीबार २०:५०

एक टेलिभिजनमा प्रशारित तपाईंको अन्तर्वार्ता धेरै पटक सुनेँ । तर, कुनै हालतमा पनि तपाईं मेरो अभिभावकको भूमिका निर्वाह गर्ने संस्थाको जिम्मेवार व्यक्ति हो जस्तो लागेन । मेरो मनमा लागेका केहि कुराहरु राखेको छु, जवाफ दिनुहोला ।

१. तपाईं सेयर बजारको जिम्मेवार निकाएको कर्मचारी भएर सेयर बजारलाई नियन्त्रण गर्ने शैलीमा बोल्नु उचित हुन्छ ?

२. सेयर बजार किन घट्यो भन्दा ब्याजदर बढ्यो कोरोनाको बेलामा सबै पैसा सेयरमा आयो कोरोना सकियो अनि बजारको पैसा बाहिर गएर घट्यो भन्ने तपाईंले दिनुभएको तर्क ठिक छ ?

३. आफूसँगै बसेर बोल्ने वक्ताले पुजी बजार संकटमा गयो भनेर बोल्दै गर्दा तपाईंले कुनै प्रतिक्रिया नदिनुको अर्थ के हो ? तपाईंले बजारलाइ दुर्घटनामा लान खोज्नु भएको हो ? तपाईं जिम्मेवार मान्छे हैन ?

४. सरकार अर्थमन्त्रालय सुतेर बस्यो भन्दा तपाईंले त्यसको खण्डन गर्नुपर्ने कारण के हो ? तपाईं सरकार र अर्थमन्त्रालयको प्रतिनिधि हो ?

५. हामीले देशब्यापी कार्यक्रम गरेर सेयर शिक्षा प्रदान गरेका छौं सचेत गराएका छौं भनेर बोल्दै गर्दा कहा के के गर्नु भएको छ ? के एउटा नयाँ सदस्यले बजारमा आउनुभन्दा पहिला के के हेर्ने भनेर कति ठाउँमा तालिम प्रदान गर्नुभयो ? जानकारी गराउन सक्नुहुन्छ ?

६. लगानीकर्ताको हकहित रक्षा गर्नको लागि सेवनले घाटा लागेको क्षतिपूर्ति दिनुपर्ने हो ? जस्ता गैरजिम्मेवार कुरा गर्न मिल्छ तपाईंले ? तपाईंसग कुन लगानीकर्ता घाटा लागेको पैसा माग्न आयो ?

७. ५८ बुदे प्रतिवेदन बुझाएको थियो केहि बिषय बाकि छन् भन्दै गर्दा के के बाकि छन् कहिले कार्यन्वयन हुन्छ भनेर स्पष्ट पार्न किन सक्नुभएन ?

८. सेयर बजारको नयाँ कुरा के आयो भन्दा बजेटमा आएका कुरा सुनाएर तपाईंले के साबित गर्न खोज्नु भएको ? हामीले बजेट पढेका छैनौ र सुनाउनु भएको ? तपाईंले लगानीकर्ताको हितमा के गर्नुभयो त्यो चैं भन्न किन सक्नु भएन ?

९. सेयर बजारमा लगानी गर्ने भनेको आफुसग नभएको बरो गरेर सटटेबाजी मात्रै गरेर लगानी गर्ने। नाफा हुदा कुनै किसिमको कसैलाई केहि छैन । घाटा हुँदा सरकारलाई भन्ने भनेर बोल्न तपाईंको नैतिकताले कसरी दियो ? के लगानिकर्ताले नाफा कमाउँदा तपाईंलाई नाफाको प्रतिसत दिनु पर्ने हो ? कि तपाईंलाई कानुन बिपरित नाफा टक्रयाउनु पर्ने हो ? यस्तो गैर जिम्मेवार कुरा बोल्न तपाईंको नैतिकताले कसरी दियो ? यस्तो गैरजिम्मेवार बोलि बोल्न अलिकति पनि लाज लागेन ? जसको कमिसन र करबाट तपाईंको जिवीका चलेको छ उसैलाई अपमान गर्न कसरी दियो तपाईंको नैतिकताले ?

१०. लगानीकर्ताले मागेको इस्यु बनाएको ४-१२ लाइ बरो गर्नको लागि माग राखे भनेर बोल्दै गर्दा रास्ट्रबैकले ४-१२ किन लगायो भनेर उल्टै रास्ट्र बैकको प्रवक्ता जसरि बोल्ने अधिकार कहाँबाट पाउनु भयो ? आफ्नो अधिकार नभएको निकायको बारेमा बोलेर आफुले आफुलाई के प्रमाणित गर्न खोज्नुभएको ? आफ्नो अफिस समाल्न नसक्नेले अर्को निकायको कुरा गर्न लाज लागेन ?

११. तपाईंको कुरा अनुसार तपाईंले गरेको काम अनलाइन आयो, आस्बा, सी–आस्बा आयो, राइट, बोनस लिस्टिङ्ग र T+२ लागु गर्‍यौं भनेर खुब आफ्नो तारिफ गर्नुभयो । यो भन्दै गर्दा अहिले कति औं शताब्दि हो तपाईंलाई थाहा छ ? अहिले सञ्चारको युगमा हरेक कुरा डिजिटल माध्यम बाट हुने जमनामा कुन ठूलो काम गरेको जस्तो लाग्यो तपाईंलाई ? आजको आधुनिक युग कहाँ छ अनि तपाईं भएको संस्था कहाँ छ ? अलिकति हेर्ने दाज्ने कोशिस गर्नुभएको छ ? आफ्नो काममा आफैं मपाई गर्न कत्ति राम्रो होला र महोदय ?

१२. नयाँ काम केहि भएन नयाँ प्रोडक्ट केहि आएन भन्दा डिबेन्चर र बन्ड लिस्टिङ गरेको छ तर उहाहरु किन्नु हुन्न भन्नुभयो । अहिले सम्म लिस्टिंग भएका डिबेन्चर र बन्ड किन किन्नुभएन भनेर सोध्ने अधिकार कस्ले दियो तपाईंलाई ? कि डिबेन्चर र बन्डमा तपाईंको लगानी भएको भएर सबैले त्यसैमा लगानी गरिदिनु पर्ने ? लगानिकर्तालाई के किन्ने के नकिन्ने तपाईंले भन्ने हो ? कसले अधिकार दियो तपाईंलाई ?

१३. बजार बढ्दा सेवनको प्रसंशा किन भएन भनेर प्रश्न गर्नु भयो तपाईंलाई अलिकति पनि लाज लागेन महोदय ? बजार बढ्दा प्रसंशा चाहिने धन्यवाद चाहिने यो के तरिका भयो ? कि तपाईंको पूर्व हाकिम लाइ जस्तै तपाईंलाई पनि दाम चढाउनु पर्ने हो ?

१४. लगानीकर्ताका १०-१२ ओटा संगठन छन ५ -६ ओटा मलाइ पनि थाहा छ भन्नुभयो । के तपाईंको सस्थाले लगानीकर्ताको सङ्गठन गठन गर्ने अनुमति दिएको छ ? यदि छैन भने त्यस्ता नियम विपरित खुलेका झोले संगठन किन हटाउनु भएन ? ५ -६ ओटा संगठनको नाम मलाइ थाहा छ भन्दै गर्दा नियम बिपरित गैरकानुनी रुपमा खुलेका झोले संगठनलाइ कारबाही गर्छु भन्ने कुरा किन आएन महाशय ?

१५. बरो गरेर लगानी गर्दा वित्तीय सस्थालाई असर गर्न सक्छ भन्नु भयो तपाईं सेवनको कर्मचारी हो कि अर्थमन्त्रालय र रास्ट्रबैकको हुलाकी हो ? आफ्नो काम थाहा छैन आफ्नो सस्था हाक्न नसकेको अबस्थामा अरुको सस्थाको किन चिन्ता ?

१६. बारम्बार ऋण लिएर लगानी नगर्नुस भन्दै गर्दा अब संस्थागत लगानी गर्ने सबै सस्था खारेज गर्ने हिम्मत छ तपाईंमा ? कुन पैसा कहाँबाट लगानी हुन्छ तपाईंलाई त्यसको चिन्ता हो कि सेवनले गर्नुपर्ने कामको चिन्ता हो ?

१७. तपाईंको हाकिम रमेस हमाल भन्नुहुन्छ, ‘म राष्ट्र बैंकसँग सम्बन्धित कुराहरु म हेर्न सक्दिनँ’ तर तपाईं राष्ट्र बैंक र अर्थमन्त्रालय दुवैको बारेमा वकालत गर्नुहुन्छ । कि तपाईंलाई सेवनको प्रमुख बन्न नपाएको रिस वा कुण्ठा पालेर बजार ध्वस्त पार्ने योजनामा लाग्नुभएको हो ?

१८. धेरैको पैसा गुम्यो । पैसाको पीडाले ज्यान गुम्ला । अनि तपाईं जस्ता गैरजिम्मेवार अभिव्यक्ति दिने व्यक्तिको हालत के होला ? क्रिपया मुख बढी हैन काम गरेर देखाउनु होला । तपाईंमा नैतिकता छ भने बजार घट्दा लगानीकर्तालाई हैन सेबोनलाई पिडा हुनुपर्ने हो । कठै मेरो देश अनि कर्मचारीको कार्य क्षमता । धिक्कार लागेर आयो मलाई तपाईंको कुराबाट । अब एक मात्र आशा छ रमेश हमालले केही गर्लान् कि ।

(प्रश्नकर्ता नवराज दाहाल सेयर लगानीकर्ता हुन् ।)

प्रतिक्रिया दिनुहोस्